Ginpanindugan sang anay tiglikom sa Department of Health (DOH) nga ang outbreak ang pertussis ang tuga na sang kahadlok nga magpabakuna dala sang mga fake news may kaangtanan sa vaccination.
Sa interview sang Bombo Radyo Bacolod kay House Majority Leader kag Iloilo 1st District Representative Dr. Janette Garin, ang vaccine scare sa nakaligad partikular na sa Dengvaxia vaccine ang nagresulta sa kahadlok sang mga pumuluyo nga magpabakuna gani gikan sa anay 95 porsyento nga vaccination rate, ini ang hinali nga nagpanaog sa 32 percent.
Panindugan sini nga sila ang ginpasakaan sang kaso, apang wala man mapamatud-an nga may kaangtanan ang kamatayon sang madamo nga mga kabataan sadto sa dengue vaccine.
Gani bisan ang mga yara sa pwesto sa karun ang nahadlok naman nga magduso sang vaccination sa kahangawa nga sila ang pato-patuan man sang kaso nga wala sang basihan.
Suno kay Garin, ang vaccine scare ang nagresulta sa outbreak sang polio, measles kag karun pertussis.
Dugang pa sini nga kulang man ang vaccine sa pungsod bangod ang mga opisyales sa gobyerno ang wala nagbakal sang madamo nga vaccines bangod sa manubo nga vaccination rate.
Sa karun, aminado ang kongresista nga nagapatigayon sang catch-up vaccination ang Department of Health, apang ginakasubo ni Garin bangod preventable lamang kuntani ang pertussis kun dako nga porsyento ang nakapabakuna.
Nagapati si Garin nga kun indi matuldukan ang vaccine scare gikan sa Dengvaxia vaccine, dako ang posibilidad nga liver cancer naman nga tuga sang infection sa Hepatitis B ang masunod nga maga-outbreak.
