Mahimo mangatubang sang kaso nga inciting to sedition si Davao del Norte 1st District Representative Pantaleon Alvarez bangod sa panawagan sa mga Armed Forces of the Philippines (AFP) members nga indi na suportahan si President Ferdinand “Bongbong” Marcos Jr.
Sa interview sang Bombo Radyo Bacolod kay political analyst Atty. Jomax Ortiz, ang panawagan sang former House Speaker sa AFP nga magwithdraw sang suporta sa Presidente sang Pungsod ang indi makonsiderar sedition bangod wala paman sang aktwal nga kinagamo nga natuga sini.
Ini ang ginpaanggid sang abogado sa frustrated homecide nga ginafile sa mga nagtuyo magpatay apang wala nadayun.
Pahayag sini nga ginatun-an na sa karun sang Department of Justice kun nagakaigo na nga pasakaan sang kaso si Alvarez.
Suno kay Ortiz, hinali nga may militar nga magsunod sa panawagan sang former House Speaker, ini ang katumbas na sa pagdestabilize sang gobyerno.
Nagapati ang abogado nga ang mga pagpanghangkat ni Alvarez subong man ni former President Rodrigo Duterte sa administrasyon ang may kaangtanan sa politika kag isyu sa West Philippine Sea.
Aminado si Ortiz nga tuman sa karun ka garot ang sitwasyon sang pungsod bangod ang gobyerno ang ginabaha sang problema kalakip na ang kurapsyon, droga, West Philippine Sea kag Charter Change.
Dugang pa nga nagakomplikado ang sitwasyon bangod nagahilapit ang 2025 midterm elections, kag ang pagsulod sang Estados Unidos nga naga-impluwensya sa politika, West Philippine Sea pati na sa kaso ni Kingdom of Jesus Christ founder Pastor Apollo Quiboloy.
Paathag sang abogado nga ang Estados Unidos ang nagabalabag sa plano sang kampo ni former President Duterte nga si Vice President Sara Duterte ang ibulos kay Presidente Marcos, bangod maapektuhan ang ila interes sa West Philippine Sea.
Suno diri, magluwas sa lokal nga problema, yara pa ang nagapadayun nga gyera sa Israel kag Iran, Russia kag Ukraine, China kag Estados Unidos, nga mahimo makatrigger sa pagluntad sang Regional War sa West Philippine Sea.
Pahayag ni Ortiz nga ang panawagan ni Alvarez, ang nagapalala lamang sa kahimtangan sang gobyerno.
