Nabatun na sang mga Taxi Drivers sa Talisay City ang ila fuel subsidy nga ila gindangop sa Ipa-Bombo Ta segment sang Bombo Radyo Bacolod sang tinalikdan.
Sa interview sang Bombo Radyo Bacolod kay Andres Panibawan, nagaserbe nga representative sang mga Taxi Drivers sang Christine Taxi, dako ang pasalamat nila sa Bombo Radyo Bacolod bangod sila ang nabuligan sa madugay nga na-pending nga ayuda.
Madumduman nga makapila nila nga ginfollow-up sa ila operator ang status sang ayuda, apang nalab-utan na sang Hulyo kag natapos na ang payout, apang ini ang wala gid makalab-ot sa ila.
Ginrequest ni Land Transportation Franchising and Regulatory Board – Negros Island Region (LTFRB-NIR) Director Atty Gerry Llena nga sa Bombo Radyo Bacolod na lamang tipunon ang mga dokumento sang wala nakabatun, kag ini ang gilayon nga nafacilitate sa LTFRB Region 6.
Nakuha sang ila nga operator ang ayuda sa LTFRB Region 6 Office sang Martes, kag gilayon man ginpanghatag sa drivers sa pagbalik tubtob kahapon.
May-ara sang 32 ka mga Taxi Drivers sa Christine Taxi nga yara sa listahan.
May mga wala naman nalakip sa listahan bangod bag-o pa lamang nga mga drivers.
Apang pahayag ni Panibawan nga sa P5,000 kada driver nga ayuda, P4,600 lamang ang ila nga nabatun bangod ginbuhinan sang operator sang tig-P400 ang kada driver para suno diri sa iya gingastos.
Apisar sini, dako na ang pasalamat ni Panibawan nga sa pihak sang pila ka bulan nga pag-hulat nabatun nagid man nila ang ayuda nga gintalana para sa ila.
