BACOLOD CITY – Gindali-dali ang pagpasar sang House Bill 4727 nga nagaduso sang liwat pagbuhi sang silot nga kamatayon sa mga krimen nga may kaangtanan sa ginadumilian nga druga.
Ini ang ginpahayag ni Congresswoman Emmi de Jesus sang Gabriela Partylist sa interview sang Bombo Radyo Bacolod.
Suno sa iya, gin-railroad ang botohay sa third and final reading sang nasambit nga hagna nga nangin alagyan sang pagpasar sini kahapon kun sa diin 217 ka mga mamalidha ang nagboto pabor, 54 ang nagkontra kag isa ang nag-abstain.
Suno kay Congresswoman De Jesus, madamo sang kwestyonable sa proseso nga gin-agyan sang nasambit nga hagna.
Mangin biktima ang mga pigado kun pormal na nga mangin layi ang House Bill 4727 ukon ang Death Penalty bill.
Sa exclusive interview sang Bombo Radyo Bacolod, ginpahayag ni Congresswoman Emmi De Jesus sang Gabriela Partylist, ginpahayag sini nga tubtob may musing sang kapaltahan ang sistema sang hudikatura sa Pilipinas, indi malikawan nga lunsay ang mga pigado lamang ang masalang sa death row.
Ginhalimbawa sini ang nagakatabo sa gyera kontra druga nga ginlunsyar sang Duterte administration kun sa diin pipila lamang ang drug lord nga nagkaladakpan samtang madamo sa nagkalamatay ang lunsay mga pigado.
Ginklaro naman ni De Jesus nga sa pihak nga ang ila grupo kag iban pa nga katapo sang Makabayan bloc ang nagboto batok sa death penalty bill, wala ini nagaka-hulugan nga wala nila ginasuportahan ang gyera kontra droga.
Suno sa iya, nagabuylog sila sa kampanya batok sa ginadumilian nga druga apang wala nila ginalantaw nga solusyon ang silot nga kamatayon.
