Gamay nga eroplano, naghugpaas sa mga pamalay sa California; napulo ka balay, nasunog

Pila ka mga persona ang ginakahangaw-an nga nagkalamatay matapos nga nagcrash ang isa ka gamay nga eroplano sa California sang Huwebes kun sa diin nagkalasunog ang pila ka mga puluy-an kag mga salakyan.

Indi magnubo sa napulo ka mga pamalay ang nagkalasunog ukon naigo sang debris nga naglapta sa malapad nga area kag ang mga salakyan sa duha ka bahin sang dalanon ang nagkalasunog sang nagtupa sa duta ang Cessna 550 sa San Diego.

Sa karun isa ka persona ang nadulaan sang kabuhi apang padayon pa ang imbestigasyon sang mga otoridad natuhoy diri.

Suno sa mga pumuluyo, wala sang may napilasan ukon nasamaran sa mga tawo sa duta kun sa diin nagtupa ang eroplano.