Ginpanindugan sang secretary general sang General Alliance of Workers Association nga bulig sa irrigation, high quality seeds kag logistics ang mas kinahanglan sang Rice Farmers.
Sa interview sang Bombo Radyo Bacolod kay Wennie Sancho, indi ini komporme sa pilit nga pagbaligya sang balor P29 nga kada kilo sang bugas sang Marcos Administration sa tinutuyo lamang nga makapahamot sa mga Pilipino.
Apang kabaylo sini, tatlo ka milyon nga mga Rice farmers ang apektado.
Ginakahangaw-an sang mga ini nga sa amendment sa quantitative restriction sang imported nga bugas, ini ang magabaha sa merkado nga makahalit sa rice industry.
Pahayag sini nga madamo sang mga rice farmers ang maga-untat na lamang kag madamo ang madulaan sang trabaho.
Panindugan sini nga napaslawan ang gobyerno sa pagcapacitate sa sektor sang agrikultura nga nagresulta sa sitwasyon sa karun sang industriya sang bugas.
Suno diri, sa karun apisar wala pa ang patubas, ang mga produkto ang nabayaran na ang mga kumprador nga chinese uko Chinese cartel.
Ginaduso ni Sancho nga dapat unahan sang gobyerno sang Pilipinas ang pagbakal sang produkto sang mga local rice farmers.
Isa man sa dapat tutukan ang mill gate prices, nga makaginansya man ang local rice farmers.
Sa pihak sini dapat mahatagan man sang mas mabaskog nga tingog ang sektor agud mapalab-ot man nila sa gobyerno ang ila sentimyento, kun sa diin ang mga nagatanom sang humay, amo ang nagakagutman.
