BACOLOD CITY — Gina-imbestigaran na sang Department of Health ang reklamo tuhoy sa maanomaliya nga kaangtanan sang Cataract Foundation, PhilHealth kag tatlo ka mga doktor sa isa ka pribado nga ospital sa Bacolod nga nagamonopoliya sa pag-opera sa naga-sufrer sang catarata kag ginaalegar nga nagapangwarta.
Ini matapos nga ginpadangat sang Task Force Crusader sa opisina ni DOH Secretary Paulyn Ubial ang reklamo santo sa resulta sang pagpanalawsaw sang Southeast Asia Center for Resource Studies and Training nga nagapakita nga may yara sang anomaliya tuhoy sa amo nga operasyon.
Santo sa reklamo, nagsugod sang tuig 2000 ang kaangay nga modus kun sa diin ginaburaw sang tatlo ka mga doktor sa isa ka pribado nga ospital ang pag-opera sa pasyente nga may catarata.
Ginaalegar nga nagatipon ang foundation sang pasyente nga ila ginapangayuan sang kwarta bisan libre ini sa PhilHealth kag nagasukot man sa ahensya ang nasambit nga foundation.
Suno kay John Chiong, deputy national commander sang TFC, sang Abril 10, nabaton na ni Ubial ang kopya sang amo nga reklamo kag nagpatigayon na sila sang imbestigasyon.
Sa inisyal nga impormasyon, may mga doktor na sa Bacolod nga gin-reprimand sang DOH may kaangtanan diri.
Nagpadala man ang TFC sang sulat sa opisina ni House Speaker Pantaleon ‘Bebot’ Alvarez agud nga makapatigayon ang Kamara sang imbestigasyon tuhoy sa reklamo.
