Halos nagtapan ang Purok Cagaycay, Barangay 2, ciudad sang Bacolod kasunod sang dako nga sunog kaina sang kaagahon.
Wala sang nasalbar nga kagamitan ang kadamuan sang mga residente sa lugar bangud nangin tuman kadasig ang paglamon sang kalayo sa mga pamalay.
Nagsugod ang kalayo alas-3:00 sang kaagahon kag nagdugay sang halos lima ka oras antes ini gindeklarar nga fire-out.
Suno kay Punong Barangay Imelda Banguaga, nagadangat sa 230 ka mga pamilya kag indi magnubo isa ka libo ka mga indibidwal ang apektado.
Totally-burned ang tanan nga mga pamalay nga nalabayan sang kalayo kag wala sang partially-burned gani halos nagtapan ang lugar.
Ini bisan nagatindog sa tubig ang kalabanan nga mga balay sa lugar.
Sa karon, nagatinir sa Andres Bonifacio Elementary School II ang mga fire survivors.
Gilayon naman nga nagpalab-ot sang bulig sa mga residente ang mga barangay officials, kalakip na ang Department of Social Welfare and Development (DSWD) kag Philippine Red Cross, agud nga makakaon ang mga pumuluyo.
Kadungan sini, nagpanawagan si Banguaga sang bulig para sa mga fire survivors kaangay sang pagkaon, bayo, habol, kag kagamitan sa pagluto kaangay sang kaldero, kalaha kag iban pa.
Kasunod sang dako nga sunog, gilayon nga ginlunsyar sang Bombo Radyo Bacolod ang Oplan Kabalaka agud nga makatipon sang donasyon.
Paagi sa station manager sang estasyon nga si Bombo Mary Divine Grace Cuello, nagapanawagan ang Bombo Radyo Bacolod sa sin-o man nga makadonar sang bugas, delatas, noodles, bayo, uniform para sa mga estudyante kag galamiton sa pagluto.
Ang mga donasyon ang sarang madul-ong sa estasyon sang Bombo Radyo tubtub sa Miyerkules, Hunyo 12 sang hapon.
Ini ang igadul-ong naman sa mga nasunugan sa Huwebes.
Subong pa lang, nagapasalamat na ang estasyon sa mga may bulawanon sang tagipusuon.
