30 porsyento na nga nahuman ang ginakay-o nga Handumanan-Cabug Road sa ciudad sang Bacolod.
Sa interview sang Bombo Radyo Bacolod kay Engr. Julio Belleza, project engineer sang Bacolod City Engineer’s Office, gin-athag sini nga bal-ot bal-ot lamang ang ila nga pagtrabaho sa dalan bangod indi nila mahimo nga palawigon ilabi na nga madamo sang mga nagalabay nga salakyan.
Suno diri, samtang ginakay-o nila ang isa ka segment, ginabuksan ang pihak nga bahin agud padayun nga malabayan ang dalan.
Samtang indi man nila mapwersa ang tayuyon nga pagpadayun sa pagconstruct sang dalan kun naga-ulan ulan bangod mangin mahumok ang pundasyon sini kag madasig nga magcrack ang dalan.
Apang pasalig sini nga basta maayo ang tiyempo, yara gid ang mga construction workers sa pagtrabaho.
Aminado man ini nga may mga komunidad sa lugar kalakip na ang One Communities South Hill, nga wala sang mahimo kundi ang maglabay sa dalan kag indi man mahimo nga palibuton sa iban nga lugar.
Suno kay Belleza, nahibaluan lamang nila ang problema sa entrance sang subdivision sang may nagpalab-ot sang reklamo.
Ini ang gilayon man nila nga gin-inspect upod sa contractor nga MKU Construction and Supplies kag gilayon man nga ginhimuan sang remedial measure.
Nahibaluan nga ang dalan nga nagalaba sang 1.3 kilometers ang gin-umpisahan sa pagkay-o sang Abril subong nga tuig kag natalana matapos sa Setyembre 2025.
