Arestado ang isa ka ginakabig nga High Value Individual sa drug buybust operation nga ginpatigayon sang Philippine Drug Enforcement Agency-Regional Office 6 sa Purok Kagaykay, Barangay 2, Bacolod City.
Ang nadakpan ang ginkilala kay Alyas Kevin.
Sa interview sang Bombo Radyo Bacolod kay Agent Bamboo, Team Leader sang PDEA 6, madugay na nila nga ginamonitor ang arestado kag sa karun madinalag-on nila nga napatigayunan sang drug buybust operation kag naaresto ini.
Si Alyas Kevin ang nakuhaan sang kapin 20 grams nga suspected shabu kag ginabanta nagabalor sang P136,000.00
May narecover man nga non-drug items, cash bilang proceeds kag cell phone.
Natalana nga pagadal-on sa opisina sang PDEA ang naaresto agud nga patigayunan sang drug test kag laboratory test sang drug items nga narecover diri.
Si Alyas Kevin, ang wala pa makaagi nadakpan sa operasyon sang PDEA apang hibaluon pa kun ini ang nadakpan na sa operasyon sang mga kapulisan.
Suno kay Agent Bamboo ang PDEA kag ang mga counterparts sini ang indi man mag-untat sa pagpanakop sang mga indibidwal nga naga engaged sa illegal nga druga.
Ang nasambit nga ahensya ang may ginapatigayon man nga information drive agud nga mapahibalo sa publiko nga illegal ang pagbaligya kag indi maayo sa ikaayong lawas ang illegal nga druga.
