Kagab-i, ang ginamonitor nga Low Pressure Area ang nangin isa na ka mahina nga Bagyo ukon Tropical Depression sa naamihan sang Batanes.
Ini ang una nga Bagyo sa Pilipinas subong nga 2025, nga ginhingadlan nga Tropical Depression “AURING”.
Alas-8:00 sang gab-i tubtob alas-2:00 subong nga kaagahon, nagtabok ang Bagyo sa Taiwan kag naggwa na sa Philippine Area of Responsibility.
Alas-4:00 kaina sang kaagahon, ang Bagyo Auring ang naghuyang na balik sa LPA.
Ang LPA ang ulihi nga nasiplatan sa 180 km North sang Itbayat, Batanes kag padulong na sa Eastern China.
Ini ang wala na derekta nga epekto sa pungsod, apang ang Trough ukon ikog sang LPA ang magadulot man sang pag-ulan sa pila ka bahin sang Northern Luzon.
Samtang malauman man ang maulanon nga panahon sa nabilin nga bahin sang pungsod.
Ini bangod sa pagbalik sang Easterlies ukon mainit nga hangin gikan sa Dagat Pacifico.
Sa idalom sang Easterlies, yara man ang Intertropical Convergence Zone ukon ang pagbunggu-anay sang hangin gikan sa Northern kag Southern Hemisphere.
Ang Easerlies kag ITCZ ang lauman nga makatuga sang maulanon nga panahon sa dako nga bahin sang pungsod tubtob sa masunod nga inadlaw.
