Gin-inspeksyon na sang team nga ginalakipan sang mga tiglawas nagikan sa World Health Organization, Department of Health kag Research Institute for Tropical Medicine ang pasilidad sa Teresita Jalandoni Provincial Hospital sa ciudad sang Silay agud mangin COVID-19 testing laboratory.
Suno kay Provincial Consultant Albee Benitez, positibo ang nangin resulta sang pagbisita sang inspection team apang may pila lamang ka mga requirements nga dapat hitsuhon agud nga makakuha ini sang lisensya kag maka-operate sa mas madali nga panahon.
Liwat naman sila nga nagsapol kagab-i upod ang inspection team agud nga istoryahan kun ano pa gid ang mga kinahanglan nga requirements agud makaangkon sang kaugalingon nga testing center ang Negros Occidental.
Nahibaluan nga sa bilog nga Region 6, ang Western Visayas Medical Center sa Iloilo pa lang ang naga-operate nga testing laboratory.
