Maathag para sa political analyst nga angot sa impeachment trial batok kay Vice President Sara Duterte ang pag-imbestigar sang National Bureau of Investigation kay Senator Alan Peter Cayetano angot sa gina-alegar bidding kag funding anomalies sa mga proyekto sang 2019 Southeast Asian (SEA) Games.
Madumduman nga si Cayetano sadto ang chairman sang Philippine Southeast Asian Games Organizing Committee (PHISGOC).
Sa interview sang Bombo Radyo Bacolod kay Atty Jomax Ortiz, nagapati ini nga may Chief Political Operator ang Malacañang may kaangtanan sa impeachment case ni VP Sara.
Ginalantaw sini nga antes paman, ginpreparar na sang Malacañang ang mga sarang makaso sa mga Senador nga kaalyado ni Duterte, kag nakoordinar na sang temprano sa NBI.
Gani nagakaigo na lamang nga timing ang ginhulat agud ang mga ini ang ipagwa.
Nagapati si Ortiz nga tuyo gid sang administrasyon nga ma-impeach si VP Sara, apang mabudlayan sila nga makuha ang 16 votes treshold.
Gani isa isa nila nga ginapapriso ang mga kaalyado, agud mangin kwestyonable ang 16 votes treshold kun madamo sang indi makaboto.
Nagapati si Ortiz nga ini ang kabahin pa sa intimidation plan sang Malacañang.
Una sang mga ini nga ginpapriso si Senator Jinggoy Estrada, may warrant of arrest ang International Criminal Court kay Senator Bato Dela Rosa, kag halos wala ginlauman nga mahimo pa nga mapapriso si Senator Rodante Marcoleta.
Madumduman nga sa karun, si Senator Alan amo ang pinakamagahod nga nagakontra sa prosekusyon, gani siya naman ang sunod nga gintarget.
Kun sa diin isa sa mga na-ukayan nga pwede magamit batok sa iya amo ang isyu sa 2019 SEA Games.
Samtang mahimo nga ipahigad anay ang kaso batok kay Department of Public Works and Highways (DPWH) Secretary Vince Dizon, apisar nga ini ang presidente kag chief executive officer (CEO) sadto sang Bases Conversion and Development Authority (BCDA), bangod mas prayoridad ang pagpapriso kay Cayetano.
Para kay Ortiz, indi na matago nga may pangamot ang Malacañang sa mga tikang, samtang ang mga travel abroad ni President Ferdinand “Bongbong” Marcos Jr ang kabahin man sa grand design agud mapakita nga wala sang labot ang Presidente sa impeachment trial.
