BACOLOD CITY – Mahimo pa gihapon nga maka-apela ang walo ka mga empleyado sang city government sang Bacolod nga gin-dismiss ukon ginpahalin na sa serbisyo bangud sa ma-anomaliya nga pagbakal sang 50 milyones pesos nga furniture and fixtures sa Bacolod City Government Center sang tuig 2008.
Nahibaluan nga kahapon sang udto, ginserbe na ang dismissal order batok kanday City Agriculturist Atty. Goldwyn Nifras nga nagserbe BAC chairman; City Budget Officer Luzviminda Treyes; Department of Public Services Head Nelson Sedillo; anay City Accountant kag karon Executive Assistant Eduardo Ravena; Jaries Ebenizer Encabo; Aladino Agbones; Melvin Recabar nga pinuno sang BAC Secretariat kag ang manugretiro na kuntani nga si Belly Aguillon sang City Engineer’s Office.
Suno kay Carmelo Orbista, OIC-city Director sang DILG Bacolod City, may epekto man gihapon ang temporary restraining order (TRO) nga ginhingyo sang mga empleyado sa Court of Appeals kun paboran ini sang korte.
Sa tion nga makuha nila ang TRO, pagadal-on ini sa Office of the Ombudsman nga amo naman ang magamandu sa DILG kun ano ang masunod nga tikang.
Nahibaluan nga magluwas sa dismissal from service, kalakip sa accessory penalties amo ang forfeiture of retirement benefits, perpetual disqualification from holding public office, cancellation of civil service eligibility kag pagdumili sa pagkuha sang civil service examinations.
Kun wala na sa public service ang natungdan, suno sa Ombudsman, sila ang magabayad sang multa nga katumbas sang isa ka tuig nga sweldo kaangay nanday bids and awards committee member Gliceria Caduhada kag City Treasurer Annabelle Badajos.
