Gina-alegar nga tuga sang ginsunog nga egg tray ang gintunaan sang kalayo sa sunog nga nagluntad sa Purok Kagaykay, Barangay 2, Bacolod City pasado alas-3:00 kaina sang kaagahon.
Sa interview sang Bombo Radyo Bacolod kay Casie Nebrida, sa kaingod lamang nila nga balay nag-umpisa ang kalayo.
Paathag sini nga si Alyas Waldo, pangayaw sa lugar, ang nagaserbe nga caretaker sang balay.
Masami naman ini nga nagasunog sang egg tray nga nagaserbe sini nga panabog sang lamok.
Suno kay Nebrida, makapila na nila ginsaway si Waldo bangod may nagluntad naman nga dako nga sunog sa Purok Kagaykay sang 2019, kag may hapo pa ang iya ugangan.
Apang kapin alas-2:00 sang kaagahon, ginapahayag nga liwat nagsunog sang egg tray si Waldo bangod madamo sang lamok, apang nalab-ot sang kalayo ang carpet tubtob sa nagdako ang sunog.
Nabatian pa nila ang paglinagapok sa kaingod apang nagpinsar ini nga may kaaway si Waldo, kag wala naman nila gingwaan bangod sa kahangawa nga maulamid.
Tubtob nga ini ang nagsinggitan na sang tabang, gani ginsugo na ni Nebrida ang iya bana nga lantawon ang sitwasyon, kag didto palang nakit-an nga yara na sa dingding sang ila balay ang kalayo.
Ginhingagaw na lamang sini salbar ang iya pamilya, ilabi na nga madamo sang kabataan sa ila nga balay gani ini ang wala gid sang bisan isa ka gamit nga nasalbar.
Nagbalik pa sa nagakalayo nga balay ang ila ido, gani apisar nga ini ang buhi, nasunog ang iya nga mga balahibo.
Sa karun padayun pa ang mapping, apang ginalantaw nga nagdangat sa masobra 50 ang nasunog nga balay.
Sa karun ang mga evacuees ang yara sa Barangay Hall sang Barangay 2, Bacolod City.
Nagcontact naman si Bacolod City Lone District Congressman Greg Gasataya, sa sarang nga mabulig sa mga biktima.
