Gin-taningan man ang kabuhi bangud sa una nga diagnosis sang mga doktor nga stage 4 cancer, wala ini nangin upang sa isa ka Bacoleño Bar Exam passer agud nga malab-ot ang iya mga handom.
Sa programa nga Kahapon Lamang, ginsaysay ni Atty. Mark Steven Mayo kun paano niya nalampuwasan ang mga pagtilaw nga nag-abot sa iya kabuhi antes niya nalab-ot ang ginahamtangan niya sa karon.
Suno diri, manugtapos na ini sadto sa law school sa University of St. La Salle-Bacolod sang gintaningan sang mga doktor ang iya kabuhi sang isa tubtob duha ka bulan.
Apang nagapati siya nga indi didto magatapos ang iya nga istorya bangud tuman ang pagsalig sini sa Ginoo.
Matapos ang pila ka mga test nga ginpatigayon sa iya, nagnegatibo ini sa kanser.
Suno sa iya, naghatag sang dugang nga kaisog ang iya inagyan agud nga malampuwasan pa gid ang mga sirkumstansya sa palaabuton lakip na ang pagkuha sang Bar exam.
Tuman ang pagpasalamat ni Mayo sa iya nga support system lakip na ang iya mga ginikanan, kahagugma kag mga boss kaangay ni Congressman Greg Gasataya agud malab-ot ang iya mga handom.
Nahibaluan nga si Mayo ang nagdako sa puder sang iya lolo kag lola sa Barangay E. Lopez, Silay City asta makatapos ini sa elementary.
Ginkuha lamang ini sang iya mga ginikanan sang nag-highschool na siya sa Negros Occidental High School.
Sa USLS-Bacolod man ini nagtapos sang iya nga kolehiyo.
Suno kay Mayo, nagdako siya sa iya mga grandparents bangud nga kinahanglan nila magbulagay nga magpamilya bangud madamo sila nga mag-utod.
Si Mark ang ika-lima sa anom nga mga kabataan nanday Selfa kag Punong Barangay Diosdado Mayo sang Barangay 22.
Madumduman nga nangin Best Debater kag Best Speaker sadto si Mayo sa ginpatigayon nga Debate sa Bombo.
Pananglitan nga mahatagan sang kahigayunan nga makasulod sa pulitika, suno kay Mayo luyag sini nga magserbisyo man sa publiko kaangay sang iya amay.
Indi gid magkalipat sa Ginoo kag sa pagbalikid sa mga nagbulig ang nangin mensahe sang iloy sang isa ka Bacoleño nga nakapasar sa 2019 Bar examination.
Suno kay Selfa Mayo, iloy ni Atty. Mark Steven, kadamo sang tawo sa likod sang iya bata agud makatapos sa pag-eskwela.
Suno diri, tuman gid ang ila sadto kabudlayan agud nga makapa-enroll lang ang iya anak sa College of Law sa University of St. La Salle-Bacolod.
Nadulaan na kuntani sang paglaom agud nga makapadayon si Atty. Mark sa pag-eskwela, may nag-abot nga mirakulo duha ka adlaw antes ang enrollment.
Ginadayaw gid ni Mrs. Mayo ang Ginoo nga wala nagpabaya sa ila.
Bilin lamang sini karon kay Atty. Mark nga mangin humble gid dapat sa tanan nga tion kag indi gid magkalipat sa Ginoo nga naghatag sang tanan.
Tuman ang pasalamat sini sa tanan nga mga tawo nga sa likod sang mga handom sang iya bata.
Suno sa iya, wala gid subong sang sudlan ang kalipay nga iya nabatyag bangud proud gid siya nga iloy nga may yara sang bata nga isa na ka abogado.
