Ginkumpirmar sang alkalde sa banwa sang La Castellana nga wala gin-aprubahan sang Mines and Geosciences Bureau (MGB) ang duta nga pagabutangan kuntani sang permanente nga relocation site sang mga residente sang banwa nga nagapuyo sa 4-6 kilometers sang Permanent Danger Zone sang Bulkan Kanlaon.
Sa interview sang Bombo Radyo Bacolod kay La Castellana Mayor Rhumyla Nicor Mangilimutan, ang ila nga gintanyag nga duta sang LGU nga himuon nga relocation site sang mga residente nga nagapuyo sa sa 4-6 kilometers sang Permanent Danger Zone sang Bulkan Kanlaon ang indi makapasar sa MGB.
Suno kay Mangilimutan, wala nakasapar ang duta bangud ang ginapangayo sang nasambit nga ahensya nga distansya halin sa kudal sang sanitary landfill amo ang 250 meters apang sa nasambit nga duta ang 150 meters lamang.
Suno sa alkalde, sa karun kinahanglan nila nga makakita sang duta para sa relocation site nga may nagtanyag naman apang ang problema sa karun sang LGU ang kwarta nga ibakal sang duta kag ang provincial government sang Negros Occidental ang may yara na sang ginbutang nga pondo nga P14 million para sa site development sang relocation site.
Magluwas sa pondo para sa duta mangita pa sila sang pondo para sa mga balay nga nagabalor sang P10 million sa 36 households.
Ang duta nga ginatanyag ang makita sa Barangay Lalagsan kag Barangay Talaptan.
Nagadangat naman sa 2300 families ang kinahanglan nga irelocate nga nagapuyo sa 4-6 kilometers sang Permanent Danger Zone sang Bulkan Kanlaon.
Nagpanawagan man sang pagintsindihanay kag pagbuligay sa pihak sang kabudlayan sang sitwasyon kag apisar nga makapoy na wala man ini sang mahimo bangud ang sitwasyon ang tuga sang kalamidad.
