Ginkalipay ni Bombo Mary Divine Grace Cuello, Station Manager sang Bombo Radyo Bacolod ang paghatag sang kaathagan ni Ricky Serenio sa isyu sang mga protectors sini ilabi na ang una sini gintumod nga taga Bombo Radyo Bacolod.
Suno kay Bombo Divine, base sa deskripsiyon ni Serenio, natumod ang mga nagagamit sang pangalan sang Bombo nga sanday Brgy. Kagawad Edwin De Pedro sang Brgy. 12 Talisay City kag Brgy. Kagawad Joe “JoeLibs” Liboon sang Brgy. Bata Bacolod City, lunsay madugay na nga naghalin sa Bombo Radyo matapos nga nagpadalagan sang 2007 Barangay Elections.
Suno kay Bombo Divine, polisa sang network nga sa pagbiya sang isa ka empleyado sa Network, automatic nga ginadula na ang pag-angot sang tinaga nga “Bombo” sa isa ka tawo, ilabi pa ang mga nagpadalagan sa mga posisyon sang ti-on sang eleksiyon.
Hugot nga ginadumili-an sang pamunuan sang network ang paggamit sang tinaga nga “Bombo” sang isa ka tawo lamang masulong ang iya personal nga interes.
Sa liwat, ang Bombo Radyo Philippines bilang isa ka network, may Internal Ombudsman nga nagapasiguro nga wala sang kung sin-o man nga empleyado ang magpadayon sa iya personal nga interes kag magmusing sang pangalan sang Bombo Radyo.
