Ginpanginbulahan sang gobernador sang Negros Occidental ang tanan nga effort sang mga atleta sa ginpatigayon nga Western Visayas Regional Athletics Association (WVRAA) Meet 2024.
Suno kay governor Eugenio Jose Bong Lacson, ginalauman sini nga ang mga gold medalists sang probinsya ang maka-contribute para sa region 6 sa Palarong Pambansa nga patigayunon sa Cebu sa Hulyo.
Dako man ang pagsalig sini sa mga tagdaog gikan sa iban nga probinsya sa pagcompete sa national level.
Nag-angkon sang may pinakamadamo nga medalya ang probinsya sang Iloilo nga ginasundan sang Negros Occidental, apang suno sa gobernador posible nga naapektuhan ang performance sang mga atleta sang Negros Occidental bangod sa limitado nga tiyempo sa pag-ensayo kag preparasyon.
Indi kaangay sa Iloilo nga nagpatigayon sang Panlarong Panlalawigan sang Pebrero samtang ang Negros Occidental naman ang naulihi kun sa diin nahatagan lamang sang duha ka semana ang mga atleta matapos ang Panlarong Panlalawigan kag amo naman nga nag-umpisa ang Regional Meet.
Ginkwestyon man sang gobernador ang mga officials sang Iloilo kun sila nag-hire sang special coaches kag trainors, apang suno sa Iloilo, wala sila sang may ginhire kag ila nga mga coaches kag trainors ang naghasa sa ila nga mga atleta.
Samtang, pagatun-an pa kun may yara sang cash incentives nga ihatag sa mga medalists.
