Aminado ang gobernador sang probinsya sang Negros Occidental nga madamo nga mga pumuluo ang luyag nga matapos na ang Enhanced Community Quarantine (ECQ) nga nagsugod sang Marso 30 agud makagwa na ang mga ini sa tagsa ka panimalay.
Sa interview sang Bombo Radyo kay Governor Eugenio Jose “Bong” Lacson, ginapanginbulahan sini ang tanan nga mga Negrense nga nagakooperar sa pagpatuman sang Enhanced Community Quarantine sa probinsya.
Santo data sang Philippine National Police (PNP) suno kay Lacson, 90 porsyento nga matawhay ang probinsya humalin sang ginpapanaog sini ang Executive Order nga nagapatuman sang ECQ.
Nagapasalamat man ang gobernador nga nag-ugyon ang mga pumuluyo.
Nagalaum man ini nga magpadayun ang pagnubo sang kaso sang infected sang nasambit nga balatian agud malift na ang ECQ sa probinsya apang antes pa man, kinahanglan konsiderahon ang sitwasyon sa ciudad sang Bacolod bangud ini ang sentro sang commerce kag mga negosyo.
Sa tion nga ini maextend ang ECQ, magatakop na ini sa Abril 14.
