Masobra 700 ka sako sang NFA rice ang mabaton sang kada local government unit (LGU) kasunod sang pangako ni Governor Eugenio Jose Lacson nga magahatag ang provincial government sang P1 million worth sang rice assistance sa tanan nga LGU kun ipatuman na ang enhanced community quarantine.
Sa interview sang Bombo Radyo Bacolod kay Atty. Japhet Masculino, pinuno sang Office of the Provincial Agriculture (OPA), ginpahayag sini nga ang isa ka sako sang NFA rice ang nagabalor sang P1,250 gani kun hatagan sang tag-P1 million ang kada LGU agud ibakal sang bugas, sarang sila nga makabakal sang masobra 700 ka sako sini.
Samtang, ginpasalig naman ni Masculino nga may supisyente nga suplay sang bugas ang NFA nga mahimo magamit sa sulod sang tatlo ka bulan ukon tubtob sa Hunyo.
Suno diri, may yara sang 16 mil ka sako sang bugas nga bilin karon sa NFA kag may manug-abot pa nga kapin 100 mil ka sako sang bugas nga suplay para sa bulan sang Marso kag Abril nagikan sa regional office.
Nahibaluan nga P27 kada kilo ang bili sang NFA rice sa karon.
Ginpasiguro man sang NFA nga magabaligya lamang sila sang bugas sa mga LGU.
Magluwas diri, ginkumpirmar man ni Masculino nga may nag-abot man nga 60 mil ka sako sang imported rice nagikan sa Vietnam nga ginbakal sang mga private rice dealers sa probinsya.
