Nagmando si Negros Occidental Governor Eugenio Jose ‘Bong’ Lacson sa Negros Occidental Police Provincial Office nga usisaon kun sin-o ang mga suspetsado nga nagkawat sang painting sang national artist nga si Fernando Amorsolo sa Hofileña Museum sa ciudad sang Silay sang Biyernes.
Nakita sa CCTV footage ang duha ka suspek nga babayi kag lalaki nga nag-upod sa grupo sang mga turista sulod sa museum.
Ginsulod sang suspek sa bag ang 12 by 18 inches nga painting kag naggwa sa exit.
Sa pagtsekyar sa log book, naggamit sang peke nga ngalan ang duha ka suspetsado.
Nagtanyag naman sang P25,000 nga padya si Silay City Mayor Joedith Gallego sa makatudlo sa mga suspetsado.
Samtang, nagmando naman si Governor Lacson sa mga kapulisan nga usisaon kun sin-o ang mga suspek para marekober ang ginkawat nga painting.
Suno diri, may yara na sang lead ang mga kapulisan.
Panawagan sang gobernador nga kun tani mabalik na ang painting bangod ang balor sini ang indi mabaylohan sang amo man nga balor sang kwarta.
