Wala gin-ugyunan sang gobernador sa probinsya sang Negros Occidental ang panawagan sang United Sugar Producers Federation (UNIFED) sa pagdeklarar sang State of Calamity.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, may nagakaigo pa nga pondo ang probinsya agud ibulig sa mga apektado sang El Niño phenomenon.
Paathag sini nga ang purpose sang pagdeklarar sang State of Calamity amo ang ma-access ang Quick Response Fund sang probinsya.
Sa pihak nga bahin, wala man ini nagapabor sa panawagan ni UNIFED President Manuel Lamata nga magbakal sang eroplano ang provincial government para sa pagpatigayon sang cloud seeding.
Paathag ni Lacson nga mahimo maka-arkila sang eroplano ang probinsya, apang ang rasun nga wala makapatigayon sang cloud seeding ang bangod sa wala sang seedable clouds.
Dugang pa sini nga kun magbakal sang eroplano, ini ang tayuyon na nga gastos sa probinsya bangod galastuhan pa ang maintenance sini, samtang indi man kada tuig nagaluntad ang El Niño.
Gani hinali nga magbakal sang eroplano ukon helicopter para sa nasambitan nga purpose, ini ang magarahe lamang kag mahimo pa nga hulamon sang iban.
Ini ang indi praktikal para sa gobernador, kun sa diin ang kwarta ang sarang pa nga magamit sa paghatag sang assistance.
Karun nga may available pa nga budget ang probinsya, ini na lamang ang temporaryo nga gamiton kag tun-an na lamang ang pagdeklarar sang State of Calamity kun kulangon na sa pondo.
Dugang pa sang gobernador nga may mga local government units (LGUs) naman nga nagdeklarar sang State of Calamity agud ma-access ang ila quick response fund, gani indi na kinahanglan sang province wide nga deklarasyon.
