Wala sang problema para sa gobernador sang Negros Occidental kun may yara sang luyag nga magkontra sa iya sa palaabuton nga 2025 midterm elections.
Suno kay Governor Eugenio Jose Bong Lacson, indi man sini mahimo nga pilion ang magakontra sa iya kag kun may partido nga luyag magapadalgan sa posisyon sa probinsya, may yara man sila sang kinamatarong nga magbutang sang ila contender.
Madumduman nga ginkumpirma na sang gobernador nga liwat ini nga magapadalagan sa 2025 mid term election para sa ulihi sini nga termino.
Samtang sa bahin naman sang United Negros Alliance, may yara sang ginalantaw nga isa ka alkalde sa Southern Negros ang ila nga ibutang para magpapili bilang bise gobernador.
Ginpahayag ni Hinobaan Municipality Mayor Ernesto Estrao, nga ginakonsederar sini ang plano sang Partido Demokratiko Pilipino (PDP)- Negros Occidental nga siya ang suportahan para magpapili bilang congressman sa 6th distirct.
Sa interview sang Bombo Radyo kay Mayor Ernesto Estrao, luyag sang (PDP)- Negros Occidental nga magbutang sang kandidato sa kada banwa kag ciudad sa probinsya.
Suno diri, nagakonsulta pa ini sa ila nga plano samtang nagalibot naman ini sa mga banwa kag ciudad para mangayo sang suporta sa mga lideres.
