Madinalag-on ang ginpatigayon nga grand launching ceremony sang 47th Masskara Festival sa Oktubre 1 tubtob 18.
Ang Masskara Festival 2026 ang may tema nga “Share the smile, celebrate gugma.”
Ang grand launching ang gintambungan ni Bacolod City Mayor Greg Gasataya, Representative Alfredo “Albee” Benitez, kag mga konsehal sang ciudad.
Isa sa nagapanguna nga gin-anunsyar amo ang pagbag-o sang venue para sa Arena Dance Competition nga patigayunon na sa sentro sang SM City Bacolod.
Ini bangod may mga bahin sang Paglaom Sports Complex nga ginapahayag delikado na para sa mga tumalambong kun didto patigayunon ang event.
Samtang amo gihapon ang mangin routa para sa Street Dance Competition.
Pito ka eskwelahan ang kabahin sa School Category nga ginalakipan sang Montevista Elementary School, Sum-ag Elementary School, Vista Alegre-Granada Relocation Elementary School, Vista Alegre Elementary School, Mandalagan Elementary School, Handumanan Elementary School 1 kag Education Training Center School II.
Samtang walo naman ang makigbahin sa Barangay Category nga ginalakipan sang Barangay 6, 10, 13, Alangilan, Bata, Mandalagan, Handumanan, kag Taculing.
Kalakip man sa balantayan nga aktibidad ang handog ng Bombo Radyo at Star FM sa Masskara Festival 2026 “MASSRAKRAKAN: Bombo Battle of the Bands” – A showdown of finest Local Bands in Bacolod City and Negros Occidental, nga patigayunon sa Oktubre 15 sa Bacolod City Public Plaza.
Sa speech ni Festival Director Rodney Mitz Ascalon, pahayag sini nga ang Masskara Festival ang indi lang basta kapiestahan, kundi ini ang nagapakita sang feelings sang kasadya, kag identity sang mga Bacolodnon.
Align sa vision ni Bacolod City Mayor Greg Gasataya, may mga programa nga para sa nagkalainlain nga sektor.
Ini bangod indi nila luyag sang audience lamang, sa baylo gusto nila nga mabatyahan sang tanan nga sila ang ‘included.’
Samtang sa mensahe naman ni Bacolod City Lone District Representative Alfredo “Albee” Benitez, ginpahayag sini nga ang Masskara Festival ang nagahakot sang pinakamadamo nga turista sa ciudad kada tuig.
Ini ang pamaagi man sang Bacolod City para mapakita ang development, bilang 3rd fastest growing city sa Pilipinas.
Pahayag ni Benitez nga tion na para ma-showcase ang Bacolod Masskara Festival indi lamang sa bilog nga Pilipinas, kundi mangin sa bilog nga kalibutan.
