Nagahingyo sang kooperasyon sang publiko ang ground commander sang security sa Paglaum Sports Complex kadungan sang ginakalangkagan nga Arena Dance Competition sang MassKara Festival bwas sa hapon.
Suno kay Police Major Joery Puerto, station commander sang Bacolod Police Station 8, Bacolod Police Station 1 ang nagasakop sang Paglaum Sports Complex apang siya ang gindesignate nga mangin ground commander sang security sa venue.
Suno kay Puerto, handa na sila para sa security kag naorient na ang mga personnel nga igadeploy sa lugar.
Indi magnubo sa 200 ka mga police personnel ang igadeploy sa Paglaum Sports Complex bangud may bastante nga augmentation force nga ginpadala sa Bacolod City Police Office.
Nakahibalo naman sang ila himuon ang mga pulis nga yara sa access areas ukon sa gate nga sudlan sang general public agud maglantaw sang arena dance competition.
Suno kay Puerto, nagahingyo sila sang kooperasyon sang tanan nga masulod sa Paglaum Sports Complex.
Ginadumilian naman ang pagdala sang backpack, ballpen kag pentel pen.
Kontrolado naman sang Presidential Security Group ang VIP Area kun sa diin may pila ka butang nga prohibited samtang sanday Puerto ang magatutok sa perimeter sa gwa sang VIP Area.
Aminado si Puerto nga crucial ang pagsulod sang madamo nga tawo sa sulod sang Paglaum gani pahanugutan na ang mga tawo nga magsulod alas-10:00 sang aga kag wala na sang movement pag-abot sang alas-2:00 sang hapon.
Nagalaom naman si Puerto nga mangin malinong ang kahiwatan kag ila tinguhaan nga mapunggan ang mga nagaplano nga magpatigayon sang protesta sa sulod sang Paglaum Sports Complex kadungan sang pag-abot sang presidente.
