Napatigayun na ang ground breaking sang bag-o nga building sang Himamaylan City Police Station sa Sitio Cubay, Barangay Talaban, Himamaylan City.
Ang ground breaking ceremony ang ginpangunahan mismo ni Police Regional Office 6 Acting Regional Director Police Brig. Gen. Jack Wanky.
Kaupod man sa event si Negros Occidental Police Provincial Office (NOCPPO) Officer in Charge Police Col. Rainerio De Chavez; NOCPPO Deputy Provincial Director for Operations Police Lt. Col. Joem Malong kag Police Lt. Col Anthony Grande, ang Officer in Charge sa Himamaylan City Police Station.
Nagtambong man sa ground breaking ceremony Himamaylan City Mayor Rogelio Raymund Tongson Jr. kag Vice Mayor Justin Gatuslao, nga nagapakita sang pag-isa sang Himamaylan City Government sa Philippine National Police (PNP), kaupod sa kumunidad, agud maseguro kalinong kag katawhayan sang ciudad.
Ang seremonya ang nagamarka sa tinutuyo nga mapabaskog pa ang law enforcement capabilities sa Himamaylan City, nga umpisa sa pagpatigayon sang mas ginpasanyog nga operational efficiency kag effectiveness sa pagserbisyo kag pagprotekta sa mga pumuluyo.
Ginpasalamatan naman ni Wanky ang Himamaylan City Government kag Negros Occidental Provincial Government kasubong man ang kumunidad bangod sa wala nagatahaw nga pagsuporta sa mga kapulisan.
Pasalig sini nga ihatag sang kapulisan ang tanan nga mahimo agud maseguro ang padayun nga pagsanyog kag kalinong kag kahilwayan nga nagakadapat para sa mga pumuluyo sa ciudad sang Himamaylan.
