Nagbalay na ang grupo sang mga negosyante sa ciudad sang Bacolod sang apat ka topiko nga luyag mabatian sa patigayunon nga State of the Nation Address (SONA) ni President Ferdinand ‘Bongbong’ Marcos Jr. sa Lunes.
Sa interview sang Bombo Radyo Bacolod kay Frank Carbon, chief executive officer sang Metro Bacolod Chamber of Commerce and Industry (MBCCI) duha sa ila ginalauman nga mabatian ang para sa pagkabug-usan nga Pilipinas samtang ang duha ang para sa Negros Island Region (NIR).
Suno diri una gid nila nga luyag nga hatagan pagtamod sang Presidente ang problema sa food security.
Ini bangod ang mga yara sa idalom sang kapogaduhon ang tuman ang pag-antos bangod sa kakulang sang food supply kag kamahal sang bili sang mga pagkaon.
Kasunod nga luyag nila nga talupangdon ang power security.
Suno kay Carbon, dapat nga mapatpat sang Presidente ang mga plano nga magaseguro nga indi na masulit ang mga red kag yellow alert sa power supply nga nagluntad sang tinalikdan nga binulan.
Samtang sa lokal nga issue, nagalaom man ang mga negosyante nga mahatagan na sang annual budget sa idalum sang General Appropriations Act (GAA) ang Negros Island Region.
Dapat nga makasugod naman sa operasyon ang development council sang NIR.
Kag ang ulihi amo ang pagbalik sang Sugarcane Industry Development Act (SIDA) nga tuman ka importante sa Negros Occidental.
Suno kay Carbon sadto P2 billion ang budget sang SIDA apang karun yara na lamang sa P500 million.
Dako ang mabulig sang pagbalik sang nakaandan nga budget agud liwat nga mabuhi ang sugar sector.
