Maayo nga butang para sa ekonomiya ang pagpasar sa Senado sang Senate Bill 2507 ukon ang Negros Island Region Act.
Sa interview sang Bombo Radyo Bacolod kay Frank Carbon, chief executive officer sa Metro Bacolod Chamber of Commerce and Industry (MBCCI), sa 2024 halos puro problema na ang nag abot sa business industry kaangay sang pagkadula sang kuryente, pagmahal sang mga balaklon kag halit sang el niño, gani ginapasalamat sini nga may bawi nga maayo nga balita.
Gindumdom ni Carbon nga sa administrasyon ni late President Benigno “Noynoy” Aquino III, sila ang may proyekto nga Interprovincial Roads kaangay sa Isabela-Guihulngan, Himamaylan-Tayasan kag iban pa.
Apang ang proyekto ang nauntat sang gindisolve ni former President Rodrigo Duterte ang NIR.
Sa tion nga mapirmahan na ni President Ferdinand “Bongbong” Marcos Jr. ang layi, mangin produktibo naman ang mga komunidad nga yara sa kabukiran, ilabi na nga mas mahapos na ang pagpanaog sang agricultural products bangod sa mga dalan.
Samtang makaeskwela naman sa ciudad kag banwa ang mga kabataan, kag makapadulong sa mga shopping centers.
Pinaagi sini, mahimo nga amat-amat naman nga madula ang insurhensya.
Mangin mas mahapos man ang pagtransaksyon sa mga government agencies bangod yara na lamang sa sulod sang isa ka isla.
Naham-ot na lamang ini sa mga nagabalabag bangod sa gina-alegar language barrier, bangod suno kay Carbon, ang dapat solbaron amo ang economic kag food barrier.
Nagapati man ang negosyante, nga nagakaigo gid ang tion sa pagpasar sang NIR, bangod nagahilapit ang eleksyon.
Suno diri, pirmahan ni President Ferdinand “Bongbong” Marcos Jr. ang hagna agud mangin mahapos ang pagbaligya sini sang boto, kalakip na sang iya mga kaalyado sa Negros Occidental, Oriental kag Antique.
