Ginakalipay sang business sector ang pagpirma ni President Ferdinand “Bongbong” Marcos Jr. sang Negros Island Region Act subong nga hapon.
Sa interview sang Bombo Radyo Bacolod kay Frank Carbon, chief executive officer sang Metro Bacolod Chamber of Commerce and Industry, dako ang importansya sang pagtukod sang NIR bangod kun ang Negros Occidental ang yara sa Region 6 kag ang Negros Oriental ang yara sa Region 7 mabudlay sa ila ang pagpangayo sang dalagko nga proyekto.
Suno diri, sa Regional Development Council sang Region 6, anom ka gobernador kag duha ka alkalde sang highly urbanized cities ang nagasapol kag masami outvoted ang Negros Occidental sa pagpasar sang mga proyekto.
Kasubong man sa Negros Oriental nga wala man maayo sang proyekto kun ipaanggid sa Cebu.
Suno diri, mafocus na ang development sa Negros Island kun mahugpong ang Negros Occidental, Negros Oriental kag Siquijor.
Isa sa pinakamaayo nga lokasyon naman para sa Regional Centers ang Kabankalan City, bangod ini ang napatung-an.
Samtang pinaagi sini, mapa-umwad man ang ekonomiya sa Southern Negros Occidental.
Apang kinahanglan man nga madugangan ang mga Inter-Provincial Roads nga magaconnect sang Negros Occidental kag Negros Oriental nga magalabay sa kabukiran.
Pinaagi sini, magasanyog man ang mga mountanous areas, matukuran sang mga negosyo kag eskwelahan, kag mangin mahapos naman ang pagpanaog sang mga produkto.
Ini ang ginalantaw man ni Carbon nga solusyon sa insurhensya.
Magluwas diri, ginalantaw man nila nga sarang na nga malobby sa National Government ang dalagkuan nga mga proyekto kaangay sa pag-improve sang seaport kag airport sa Dumaguete, kag paghimo sang Bacolod-Silay Airport nga International Airport.
Isa man sa target nga mahatag ang estable kag barato nga supply sang kuryente kag tubig.
Pinaagi sa nasambitan nga mga infrastructure developments, madamo pa sang magasulod nga foreign investors, nga magahatag sang dugang nga trabaho sa mga pumuluyo.
