Ginpahayag sang isa ka registered psychologist nga dako ang bahin sang ginikanan agud nga mahangpan sang mga kabataan ang mga impormasyon nga makuha sa online kag news outlets.
Sa interview sang Bombo Radyo Bacolod kay Dr. Moniq Muyargas, Chairperson, Division of Social Sciences sang UP Visayas, madamo sang rasun sa nagakatabo nga multiple violence sa mga eskwelahan sa karun, gani ang mga ginikanan ang dapat yara gid agud giyahan ang mga kabataan.
Suno kay Muyargas may mga impormasyon nga indi nagakadapat nga makuha sang mga kabataan gani kinahanglan may yara sang magapahangop sa ila.
Samtang ginpahayag man sini nga sila sa Philippine Psychiatric Association (PPA) kag Philippine Society for Child and Adolescent Psychiatry (PSCAP) ang nagapamatok sa natalana nga Nationwide Simultaneous School Safety Drill for Active Attack Incidents nga gintalana sang Department of Education (DepEd).
Suno diri ang nationwide drill ang indi makabulig.
Suno kay Muyargas ang nasambit nga drill ang lain sangsa sa sunog kag linog gani dapat lain nga approach ang gamiton.
Ginasuhestyon sang mga ini amo ang pagpatigayon sang tabletop exercises kag trauma‑informed protocols kaangay lamang nga mag-train sang isa ka manunudlo kag ini na ang magdiscuss sa sulod sang classroom.
Ini agud nga makapamangkot ang mga kabataan kag mapaathagan ang mga ini.
Sa nasambit nga exercises makadihon ang manunudlo sang mga himuon sang mga estudyante ingkaso nga may matabo nga pagpang-atake.
Suno diri dapat ma-exercise kun sin-o ang in-charge sa pagsirado sang pwertahan, kurtina kag iban pa.
Gindugang man sini nga ang pagkumparar sang eksperyensya sang may edad sa kabataan sa karun ang indi makabulig bangud lain ang sangun kun ipaanggid sa karun.
