Ginaduso karon sa Kongreso ang pagdugang sang kapin 2,000 ka mga guidance personnel sa mga pampubliko nga eskwelahan sa 2027 kadungan sang proposed P802 million nga pondo para pasanyugon ang mental health kag child protection services sa mga estudyante.
Suno kay House Minority Leader Marcelino Libanan, nalakip sa gin-propose nga P7.2 trillion national budget para sa 2027 ang pagtukod sang 1,800 school counselor associate positions kag 221 school division counselor positions sa idalom sang Department of Education (DepEd).
Suno kay Libanan, importante ang dugang nga counseling personnel ilabi na sa nagalala nga bullying, school violence, kag iban pa nga mga problema nga mahimo makaapekto sa emosyonal kag mental nga kahimtangan sang mga estudyante.
Para sa mamalidha, indi supisyente ang physical security agud mapabilin ang seguridad sa mga buluthuan.
Suno diri, kinahanglan man sang emotional kag psychological support para sa mga estudyante.
Ginganyat man ni Libanan ang mga pribado nga buluthuan nga magpatuman sang kaangay nga tikang.
