BACOLOD CITY — Wala nag-untat ang number two sa Top 10 sang November 2017 Chemical Engineer Licensure Examination nga malab-ot ang iya handom nga mangin engineer bisan pigado ang ila pagpangabuhi.
Si Wilmark Palacios, tumandok sang Barangay Amin, Isabela, Negros Occidental ang naga-edad na sang 24-anyos sang nakatapos sa BS Chemical Engineering bangud ikaduha na niya ini nga kurso.
Sa Good Morning Philippines program sang Bombo Radyo Bacolod, ginpahayag ni Palacios nga Education kuntani ang ipakuha sang iya magulang apang wala niya ini naluyagan rason nga nagpangita siya sang nagatanyag sang scholarship.
Bangud sini, nag-eskwela si Palacios sa Technological University of the Philippines sa Talisay City sa kurso nga BS Chemical Technology.
Sang nakagraduate na, ginpadayon ni Palacios ang iya handom nga mangin engineer rason nga nagpangita siya sang scholarship kag nagpa-enroll sa Colegio San Agustin Bacolod sa kurso nga BS Chemical Engineering.
Lubos ang pagpasalamat ni Palacios bangud nangin scholar ini sang Philippine Sugar Technologists Association, Inc. nga amo ang nagsabat sang iya gasto sa eskwelahan.
Magluwas diri, scholar man ini sang banwa sang Isabela.
