BACOLOD CITY — Ika-katorse sa 15 ka mag-ulutod ang number two sa Top 10 sang November 2017 Chemical Engineer Licensure Examination nga ang resulta ang naggwa sang Huwebes sang hapon.
Si Wilmark Palacios nga nakakuha sang 83.90 percent rating ang naga-edad sang 24-anyos, tumandok sang Barangay Amin, Isabela, Negros Occidental kag kilala sa hayo nga Ken.
Si Palacios ang nagtapos sa Colegio San Agustin Bacolod City sang Marso subong nga tuig.
Sa Good Morning Philippines program sang Bombo Radyo Bacolod, ginpahayag ni Palacios nga napatay ang iya amay sang yara pa lang siya sa 4th year high school rason nga nangin iloy kag amay sang 15 ka mag-ulutod ang iya iloy.
Bangud sini, ang magulang si Palacios nga nagatrabaho sa luwas sang pungsod ang naggasto sa iya pag-eskwela.
Aminado si Palacios nga nakaagi siya ubra sa kampo sang tubo kaangay sang pagpanghilamon kag pagpang-abono.
Suno sa iya, daw masungka na siya sadto bangud sa kainit sang panahon kag kalapad sang katubuhan apang wala ini nag-untat sa handom nga mag-eskwela.
Kada aga, iya nga ginahingabutan ang truck nga ginasakyan sang mga obreros sa kampo sang tubo agud malibre ang iya pamasahe padulong sa banwa sang Isabela.
Sa tion nga wala sang kwarta, nagakapilitan man ang iya iloy nga magpangutang sa mga kasimaryo agud nga may ipabalon kay Palacios.
