BACOLOD CITY — Christmas gift ni Wilmark Palacios sa iya pamilya ang pagpangaduha sini sa November 2017 Chemical Engineer Licensure Examination.
Sa Good Morning Philippines program sang Bombo Radyo Bacolod, ginpahayag ni Palacios nga ginhandom niya nga makapasar dayon sa una nga pagkuha sang board examination agud maregaluhan ang iya pamilya sa Barangay Amin, banwa sang Isabela.
Sa pre-board exam, nagpanguna si Palacios sa ila nga review center sa Cebu City rason nga nagkampante ini nga makasulod siya sa Top 10.
Apang sa una nga adlaw sang pasinawan, nademalasan si Palacios bangud nadula ang iya cellphone sa Cebu City.
Bangud sa kabudlay sang eksaminasyon, ginpanumdom man sini nga mahimo magatupa lamang siya sa ika-siyam ukon ika-napulo nga pwesto sa Top 10.
Apang sang ginpagwa na ang resulta sang board examination, tuman ang hilibion ni Palacios bangud sa kalipay.
Naghugyaw man ang iya pamilya sa banwa sang Isabela bangud sa iya nalab-utan.
Suno diri, basta ginatinguhaan, malab-ot gid ang handom.
Sa karon, motto ni Palacios sa iya kabuhi amo ang mangin manggaranon.
Nagpanugyan man ini sa mga pamatan-on nga sundon ang handom sa pihak sang mga pagtilaw nga masugata.
Nagahandom man ini nga makatrabaho sa luwas sang pungsod agud mahatagan sang mahamungaya nga pangabuhi ang iya pamilya.
