Nakalampuwas na sa buho sang dagom ang ginahulat nga hagna para sa prangkisa sang Negros Electric and Power Corporation (NEPC).
Sa interview sang Bombo Radyo Bacolod kay Jonathan Cabrera, spokesperson sang NEPC, nagab-ihan kagab-i antes matapos ang interpellation sang Senado.
May pila lamang ka mga senador nga nagbuya sang mga pamangkot kaangay nanday Senator Sherwin Gatchalian, Riza Hontiveros kag Coco Pimentel nga nasabat man ni Senator Grace Poe, ang sponsor sa Senate bill.
Paathag ni Cabrera nga sa pagpasar sang franchise law, ang pinakamadugo nga bahin amo ang period of interpellation, kun sa diin ginagisa ang kaundan sang hagna.
Kasunod sini magahatag sang period of amendment sa Lunes ukon Martes, apang ginalantaw sini nga minimal lamang ang bag-uhon.
Kasunod sini mahimo nga aprubahan na para sa third kag final reading sa sulod sang masunod nga duha ka semana ang hagna.
Indi naman maseguro ni Cabrera kun ini ang magalabay pa sa bicameral committee antes dal-on sa Office of the President agud nga mapirmahan kag mangin opisyal nga layi.
Nagapati ini nga ma-aprubahan ang hagna bangod ang mga senador ang nagalantaw kun ini ang makahatag sang kaayuhan sa franchise area.
Pahanumdom sini nga antes magsulod ang mga investors sa isa ka lugar, ang una nga ginaseguro amo ang estable nga supply sang kuryente.
Pinaagi sa pagsulod sang NEPC, marehabilitate na ang mga daan nga equipment sang Central Negros Electric Cooperative (CENECO).
