Ginkumpirmar sang spokesperson sang Negros Electric Power Corporation (NEPC) nga ginpirmahan na ni President Ferdinand Marcos Jr ang hagna nga nagahatag sang franchise sang NEPC gani isa na ini ka layi.
Sa interview sang Bombo Radyo Bacolod kay Jonathan Cabrera, Hulyo 26, 2024, isa ka adlaw antes pa man mag-lapse into law ang hagna, ini ang ginpermahan sang presidente.
Para kay Cabrera, dako ang kalipay sini nga ginpermahan gid mismo sang presidente ang Republic Act 12011.
Suno diri, prayoridad sang NEPC nga matuman ang tanan nga promisa sini apisar nga 15 ka adlaw pa ang magalabay antes nga mangin epektibo ang layi.
Sa karun, ginahulat pa nga mapublish ang layi, kag matapos ang 15 days, maga-apply pa sang Certificate of Public Convenience and Necessity (CPCN) sa Energy Regulatory Commission (ERC) para mahatagan ang NEPC sang permit para mag-operate.
Apang, sa karun ginakalipay sang Negros Power kag Central Negros Electric Cooperative (CENECO) nga mapadayon ang ila nga pagbuligay sa paghatag sang serbisyo sa mga consumers.
Gina-athag lamang sini nga, lima ka tuig ang rehabilitation kag modernization activity sang NEPC kag amat-amat lamang ang ila trabaho.
Apang, nagpasalig ini nga matapos ang lima ka tuig, dira na kag makahambal nga wala na ukon naghagan-hagan na ang mga unscheduled power interruptions.
