Nakabaton sang Medalya ng Kagalingan nagikan sa Police Regional Office- 6 ang hepe sang Talisay City Police Station.
Sa interview sang Bombo Radyo Bacolod kay Police Major Jigger Gimeno, ginpahayag sini nga ang nabaton niya nga pagkilala ang may kaangtanan sa Republic Act 9165 ukon ang Comprehensive Dangerous Drugs Act of 2002.
Suno kay Gimeno, apat lang ka mga pulis ang ginhatagan sang nasambit nga award kun sa diin duha ang nagikan sa probinsya sang Iloilo kag duha man ang nagikan sa Negros Occidental.
Kaupod sini nga nakabaton sang Medalya ng Kagalingan amo si Police Master Sergeant Daryl Pahilangga nga imbestigador naman sang Silay City Police Station.
Nagapasalamat si Gimeno sa mga police personnel sang Talisay City PNP bangud kun indi man bangud sa kapisan sang mga ini sa pagpatigayon sang drug buybust operations, indi man ini makabaton sang award.
Nahibaluan nga masobra na 30 ka mga Medalya ng Kagalingan ang nabaton sang hepe humalin sang nangin pulis ini.
Nagpasalig naman siya nga mas pasanyugon pa nila ang ila nga kampanya batok sa iligal nga druga.
