Gintawag nga “demonyo” sang hepe sang Victorias City Police Station ang suspek nga nag-patay sa 7 anyos nga bata nga babaye sa syudad sang Victorias sadtong Dominggo sang gab-i.
Sa interview sang Bombo Radyo Bacolod kay Police Major Eduardo Corpuz, ginpahayag sini nga gawi sang isa ka demonyo ang gin-himo ni Mark Besa sa 7 anyos nga babaye sa diin gin-rape sini ang biktima antes gin-patay kag ginsulod sa sako kag ginhaboy sa basurahan sa Villa Miranda, Barangay 6A, Victorias City.
Nahibaluan nga gin-sugo sang suspek ang biktima nga mabakal sang iya sigarilyo las-2:00 sadtong Dominggo sang hapon, kag wala na nakabalik ang biktima sa ila puluy-an rason naman nga gin-pangita na ini sang iya mga himata kag sang iban nga pumuluyo.
Sa padayon nga pag-pangita sa biktima, nakit-an sang mga residente ang duha ka sako nga naga-sampaw sa basurahan sa tupad balay ni Besa kag didto nakit-an ang naga-barikutot nga lawas sang biktima nga wala na sang kabuhi.
Base naman sa naggwa nga autopsy suno kay Corpuz, gin-rape ang 7 anyos nga biktima antes ini gin-patay paagi sa paglubag sang liog, kag paglampus sa iya ulo.
