Nagpasalig ang alkalde sang Bago City nga magapatigayon sila sang engrande nga heroes welcome para sa duha ka mga Bagonhon boxers nga nakakuha sang duha ka mga gold kag isa ka silver medals sa patag sang boksing sa nagapadayon nga Southeast Asian (SEA) Games 2019.
Una nga nakakuha sang bulawan nga medalya ang tumandok sang Brgy. Lag-asan, Bago City nga si Rogen Ladon matapos sini ginlutos ang Thailander nga kasumpong nga si Yao Tam Amarit sa PICC Forum kahapon para sa men’s flyweight division via unanimous decision.
Samtang, sunod nga nagkuha sang bulawan nga medalya para sa light welterweight division amo si James Palicte nga residente sang Brgy. Sampinit, Bago City matapos sini ginlutos ang Vietnamese boxer nga si Van Hai Nguyen.
Sa interview sang Bombo Radyo Bacolod kay Mayor Nicholas Yulo, ginpahayag sini nga tuman gid ang ila pagdayaw sa duha ka mga Bagonhon boxers nga naghatag sang kadungganan indi lang sa Bago kundi sa bilog nga pungsod.
Dugang pa sang alkalde, magahatag man ang ciudad sang cash incentives para kanday Ladon kag Palicte.
Nagpasalig naman ini nga maga-produce pa gid sang mas madamo nga boksidor ang Bago City paagi sa ila nga boxing program kun sa diin naga-ensayo ang mga kabataan nga handom nga mangin isa man ka boxing champ sa ulihi.
