Arestado ang ginakabig nga High Value Target sang Philippine Drug Enforcement Agency (PDEA) Negros Occidental sa ginpatigayon nga buybust operation sa Gardenville Subdivision, Barangay Tangub, Bacolod City kagab-i.
Sa interview sang Bombo Radyo kay PDEA Agent Bamboo, ginkilala ang subject person kay Romulo Hamantoc, residente sang Purok Kagaykay Barangay 2, Bacolod City.
Suno kay Bamboo, tuig 2019 sang una nga nadakop sang mga operatiba ang iloy sang suspetsado sa kaso man sa iligal nga druga kag matapos nga ini ang naaresto, gin-monitor man sang PDEA si Hamantoc bangud iya ginbuslan ang iloy sa pagbaligya sang druga.
Nahibaluan nga si Hamantoc ang nangin subject man sa buybust operation sang Regional Drug Enforcement Unit (RDEU) sa Purok Kagaykay, Barangay 2 apang ini ang nakapalagyo.
Kagab-i, natigayon ini nga naaresto sang PDEA kag nakuhaan sang tatlo ka bulto sang suspected shabu nga may DDB value nga P102,000 kag ang P15,500 nga buybust money.
Sa karun yara ang suspetsado sa kustodiya sang PDEA-Negros Occidental Headquarters kag natalana nga pasakaan sang kaso sa pagbayolar sa Republic Act 9165 ukon Comprehensive Dangerous Drugs Act of 2002.
