Natalana nga pasakaan sang nagasampaw-sampaw nga kaso subong nga adlaw ang number two high value target sa Negros Island Region kag anom ka iban pa ka mga kalalakin-an nga gikan sa prominente nga mga pamilya sa Negros nga naarestar sa buy bust operation sa isa ka hotel kagab-i.
Nahibaluan nga nangin madinalag-on ang joint operasyon sang City Drug Enforcement Unit (CDEU), Philippine Drug Enforcement Agency (PDEA) Negros Island Region, kag Bacolod Police Station 1 batok sa subject nga si Dindo Barcillo sang ciudad sang Silay nga ginakabig high value target level 2.
Nakuha sa posesyon sini ang duha ka bulto sang ginapatihan shabu kag home-made 38 caliber revolver.
Nadakpan man nga upod sini sa isa ka hulot sang hotel sa dalan Araneta nga naga-pot session ang mga ginapahayag gikan sa mga prominente nga pamilya nga ginkilala kanday Nico Manuel Luiz Lizares, Carl Ocampo, Mikael Nicholas Zayco, Marvin Magno, Mariano Villarosa kag Robert John Herman.
Ginabulubanta nga kapin sa 30 gramos sang shabu ukon balor P700,000 ang narekober sa mga arestado, drug paraphernalia kag armas.
Suno kay Senior Supt. Jack Wanky, director sang Bacolod City Police Office (BCPO), gin-aku ni Zayco nga tiyo sini si Kabankalan City Mayor Isidro Zayco.
Kaso nga paggamit, pagbaligya kag paghupot sang ilegal nga druga, kag paghupot sang drug paraphernalia ang ipasaka batok sa pito.
Samtang, ginkumpirmar ni Wanky nga madugay na nila nga gina-monitor ang hulag sang mga ini apang subong lang natikma.
