Dismayado naman ang punong Barangay sa Barangay Guimbalaon, Silay City sa natabo nga pagpangluthang sa besperas sang highlight sang ila kapiestahan.
Sa interview sang Bombo Radyo Bacolod kay Punong Barangay Samuel Larida, kalipayan lamang kuntani ang tinutuyo sang ila kapiestahan apang natabo ang trahedya.
Madumduman nga ginluthang ni Pedrito Penafiel, residente sa Barangay ang bangkador sa peryahan nga si Allan Tamparong, 34 anyos, residente sang Barangay Payao, Binalbagan matapos nga ini ang wala ginhatagan sang ginapangayo nga P500.
Nagapalab-ot man ini sang pagpakig-unong sa biktima kag pamilya sini.
Ginkadtuan man sang kapulisan ang balay ni Penafiel sa Hacienda Dolores apang ini ang wala nakit-an.
Nagpasalig ini nga magabulig ang Barangay agud mahatagan hustisya ang kamatayon sang biktima.
Panawagan naman ni Larida sa suspetsado nga makig-angot sa Barangay ukon sa kapulisan kag atubangon ang nahimo nga krimen.
Paathag sang Punong Barangay nga tuman ka damo sang mga bisita sa ila kapiestahan ilabi na nga kagab-i ang ila nga pageant night gani nakafocus man ang pwersa sang Barangay Tanod sa ila nga covered court.
Bangod sa insidente tubtob na lamang sa papanyaga ang Barangay apisar nga subong kuntani ang highlight sang kapiestahan.
