BACOLOD CITY – Naghimo sang kasaysayan ang Negrense athlete sa Palarong Pambansa 2019 matapos ginlutos ang kontra sa Youth Boys 56-kilogram ukon bantamweight division gikan sa Northern Mindanao.
Sa hampang nga ginpatigayon sa ciudad sang Davao kaina sang hapon, nagdaog via split decision ang 17-anyos nga si Sugary Montales gikan sa Brgy. Mailum, Bago City batok kay Kim Bryan Cabrillos.
Gikan sa napulo ka boxers nga nagrepresentar sang Western Visayas, si Montales lang ang nakasulod sa finals match.
Si Montales, ang Grade 12 student sang Ramon Torres National High School main campus sa ciudad sang Bago.
Siya ang naghimo sang kasaysayan bilang pinakauna nga atleta gikan sa Western Visayas nga nakakuha sang gold medal sa patag sang boxing sa maragtas sang Palarong Pambansa.
Sa interview sang Bombo Radyo Philippines sa Negrense athlete, tuman ang pagpasalamat sini sa Mahal nga Diyos , sa iya coaches kag sa mga nagsuporta sa iya para sa iya kampanya sa Palarong Pambansa.
Handom ni Montales nga mangin world champion sa ulihi kag idolo sini si 8-division world champion Sen. Manny Pacquiao.
