BACOLOD CITY — Dako nga halit sa humay sang mga mangunguma sa sur nga bahin sang probinsya sang Negros Occidental ang gintuga sang black bugs nga nag-atake humalin sang nagligad nga inadlaw.
Santo sa kumpirmasyon ni Provincial Agriculturist Atty. Japhet Masculino, 14 ektariya na nga hulumayan ang apektado sang black bugs.
Ini ang ginalakipan sang walo ka ektariya sa ciudad sang La Carlota City kag anom ka ektariya sa Barangay Payauan, banwa sang Candoni.
Ginabanta suno kay Masculino nga nagadangat sa 250 mil pesos ang halit nga gintuga sang mga insekto.
Ginpadala na sang OPA ang ila nga mga agriculturists agud nga lantawon ang extent sang damage kag gilayon nga mapunggan ang paglapta sini sa iban nga mga banwa.
Sang nagligad nga gab-i, nagpatigayon sang light-trapping operation ang City Agriculture’s Office sang La Carlota kun sa diin natipon ang 60 ka kilos sang black bug.
Ang amo nga insekto ang nagatuga sang pagkalaya sang humay bangud ginasupsop sini ang sap ukon duga sang humay.
Suno kay Masculino, nagamu-ad ang black bugs sa mga lugar nga madugay magmala ang tubig.
Kadungan sini, nagpanugyan ang OPA sa mga mangunguma sa Negros Occidental nga lantawon ang puno sang humay sa tion nga yara sa talamnan agud matempranuhan kun may yara sang presensya sang black bugs.
Suno kay Masculino, ang black bugs ang nagatumpok sa puno sang humay nga indi malab-ot sang tubig.
Indi ini matapna pinaagi lamang sa pag-spray sang insecticide kundi kinahanglan ang pagpatigayon sang light-trapping kag pag-apply sang metaricium.
Ang black bugs ang seasonal ukon nagatuhaw lamang sa tion sang tig-ululan.
Kadungan sini, nagpanawagan ang OPA sa mga mangunguma nga ipa-enroll sa Negros First Universal Crop Insurance Program ang hulumayan agud nga may magamit nga kapital sa masunod nga cropping season pananglitan mahalitan sang insekto ang pananom.
Ginpangabay man sang provincial agriculturist ang tanan nga municipal kag city agriculture’s office nga mangin vigilante agud nga matapna gilayon ang presensya sang mga black bugs sa ila lugar.
