BACOLOD CITY-Ginapatihan nga may deperensiya sa paminsaron ang bata nga suspetsado sa paghampak sang pala sa agtang sang iya iloy nga gintunaan sang kamatayon sini sa ciudad sang Sipalay.
Patay ang 63-anyos nga si Gloria Eseng sang Sitio Talaptap, Brgy. Cabadiangan, Sipalay City matapos ginhampak sa agtang sang pala sang maka-apat ka beses sang iya 42-anyos nga bata nga si Rolando samtang nagalikit ini sang tabako sa sulod sang ila puluy-an.
Matapos ginhampak sang pala, ginguyod ini sang suspetsado palapit sa ila banyo sa guwa sang balay kag ginsunog sa atubang sang duha ka menor de-edad niya nga mga apo.
Suno sa hepe sang Sipalay City Police Station nga si Police Chief Inspector Anthony Grande, nasunog ang natunga nga lawas sang biktima matapos ini gintampukan sang kugon kag ginsindihan sang suspetsado.
Sa pagpangusisa sang kapulisan sa suspetsado, ginpahayag sini nga nasal-an niya nga aswang ang iya iloy bangud nakita niya ini nga naga-nganga kag may dugo ang baba kag nagaguwa ang dila.
Samtang sa interview naman sa utod ni Rolando, ginpahayag sini nga may deperensiya sa paminsaron ang suspetsado kag tatlo na ka adlaw nga wala ini nakakaon kag nakatulog antes niya ginhimo ang krimen.
Mismo ang amay sang suspetsado ang ginpahayag nga naghikog man sang una matapos nga pila ka adlaw nga wala man nakatulog.
May yara man sang pakaisa ang suspetsado nga ginapahayag may deperensiya man sa paminsaron.
Ginklaro naman sang hepe sang Sipalay City Police Station nga wala nagagamit sang iligal nga druga ang suspetsado.
Suno kay Grande, handa naman nga pasakaan sang kaso ang suspetsado sang iya mga utod bangud nga nahadlok sila sa posible himuon man sini sa ila.
Nagluntad ang insidente las-11:30 sang aga kahapon.
