Magapadayon gihapon ang imbestigasyon sang gobyerno sa gina-alegar nga anomalya sa mga flood control projects apisar magatakop na ang operasyon sang Independent Commission for Infrastructure (ICI) sa Marso 31.
Suno kay Presidential Communications Office (PCO) Undersecretary and Palace Press Officer Atty. Claire Castro, ang pagsirado sang ICI ang indi nagakahulugan nga tapos na ang imbestigasyon bangud napasa na sang komisyon ang ila report kag mga ebidensya sa Office of the Ombudsman para sa dugang nga pag-usisa.
Ang Ombudsman kag ang Department of Justice (DOJ) ang padayon nga nagapatigayon sang preliminary investigation kag may gahum man nga maglunsar sang dugang nga imbestigasyon kun kinahanglan.
Ang ICI nga ginapamunuan ni Andres Reyes Jr. ang nakapadala na sang siyam ka referral nga nagalakip sang 65 ka indibidwal nga ginrekomendar nga makasuhan sa Office of the Ombudsman, kag nagtugyan man sang mga dokumento may kaangtanan sa flood control scandal.
Madumduman nga ang komisyon ang gintukod ni President Ferdinand Marcos Jr. sang Setyembre 2025 matapos sini ginbuyagyag ang korapsyon sa flood control projects sa iya State of the Nation Address.
