Ginpahanumdom sang Chapter President sang Philippine Red Cross – Negros Occidental ang importansya sa pagdugang sang supply sang dugo.
Sa speech ni Dra Rita Benita Mirasol sa Dugong Bombo 2024, ginapasalamat sini nga madamo sang blood donors nga nagbantay antes paman magbukas ang City Mall Mandalagan.
Aminado ini nga kun kaisa, mabudlay ang magkakuha sang dugo bangod dyutay lamang ang blood supply nga nagakakuha sa mga bloodletting activities.
Ang PRC ang nagahatag sang blood supply sa mga ospital, gani dako ang pasalamat nila sa duha na ka dekada nga partnership sa Bombo Radyo Philippines.
Ginpasalamatan man sini ang nagbuylog sa aktibidad kalakip ang mga men in uniforms, estudyante, civic organizations kag pribado nga indibidwal.
Ginpasalamatan man sini ang mga medical personnel kag volunteers nga nagbulig sa blood donation drive.
Suno diri, ang supply sang dugo nga matipon sang blood centers subong nga Nobyembre amo ang itigana sa bulan sang Disyembre nga manubo ang numero sang blood donations kag madamo sang nagakinahanglan sang dugo bangod sa mga aksidente.
Suno kay Mirasol, sa Disyembre naganubo ang blood donors bangod madami sang mga activities kag celebrations, kag indi kwalipikado nga makapakuha sang dugo ang naka-inom sang makahulubog nga ilimnon.
Pahanumdom sini nga sarang makadonar sang dugo kada tatlo ka bulan.
Ginapasalamatan sini nga indi lang sa Bacolod City kundi dulungan nga ginapatigayon sang Bombo Radyo Philippines ang nationwide Dugong Bombo program sa 24 ka nanarisari nga bloodletting sites.
