BACOLOD CITY — Ginpasiguro sang city government sang Bacolod nga indi pagpahanugutan ang wala naka-comply sang mga rekisitos sa luwas nga pagbaligya sang firecrackers may kaangtanan sa pagsugata sang bag-ong tuig.
Sa interview sang Bombo Radyo kay Executive Assistant Ernie Pineda, magapwesto gihapon sa likod sang Saint John Paul II Tower sa reclamation area ang mga magabaligya sang palupok.
Apang indi pagpahanugutan ang mga ini kun wala nakaagi sa fire safety seminar nga ginpatigayon sang bulan sang Oktubre.
Santo sa listahan, 76 ka mga retailers ang nakaseminar.
Kinahanglan man nga makapaidalom ang mga ini sa fire drill.
Sa tion nga mapatukod na ang structure suno kay Pineda, inspeksyunon ini sang Bureau of Fire Protection agud mahibaluan kun nakapasar sa standard ukon wala.
Magakuha man ang mga retailers sang permit halin sa city government.
Sa karon suno sa executive assistant, ginahulat pa ang resolusyon nga igapasar sang Sangguniang Panlungsod nga nagadesignar sa nasambit nga lugar bilang balaligyaan sang firecrackers.
Suno kay Pineda, ang petsa sang pagsugod sang baligyaanay sang palupok ang magadepende sa compliance sang mga vendors sa mga rekisitos.
