Indian national, nasapwan nga patay sa suba sa EB Magalona

Patay na sang masapwan sa isa ka suba ang isa ka Indian national sa banwa sang EB Magalona kahapon.

Una diri, ginreport sang iya mga himata sa Victorias City Police Station nga nadula ang biktima nga si Ranjut Singh, 24-anyos kag kahapon nasapwan na lamang ini nga nagalutaw sa Malogo River sa EB Magalona.

Suno sa hepe sang EB Magalona Municipal Police Station nga si Police Captain Jaynick Bermudez, yara na sa advance state of decomposition ang bangkay ni Singh sang ini ang nasapwan sang isa ka lalaki nga nagpatubog sang karbaw.

Santo sa pagpangusisa, depressed ang biktima bangud nga wala nagabayad ang iya mga ginpahulam sang kwarta.

Ulihi ini nga nakit-an sang iya pamilya Martes sang aga nga tuman ka hubog.